Kommunen grensar i sør mot Sognefjorden, og i nord og aust mot Sogndal kommune. I Leikanger er det eit vekslande terreng med stup-bratte fjellsider, slake fruktbare lier og flate morene-avsetjingar. Det høgaste punktet i kommunen er Gunvordalsbreen 1604 moh. Lågaste punktet finn du i Sognefjorden, - 1084 muh.
Leikanger, med fylket sitt høgaste utdanningsnivå på innbyggjarane, er eit tyngdepunkt innan kompetanseretta verksemd saman med Sogndal kommune. Sogn og Fjordane fylkeskommune og Fylkesmannen i Sogn og Fjordane har hovudsetet sitt på Hermansverk i Leikanger.
Leikanger ligg sentralt i den næringssterke regionen Midtre Sogn. Her er m.a. eit levande mediemiljø i Ingvald Husabø Prenteverk og Sogn Avis. Leikanger Næringshage er ei samlokalisering av små kunnskapsrike verksemder. I ein rapport frå 2007 kårar Telemarksforsking-Bø Leikanger til den mest attraktive kommunen å bu i i Sogn og Fjordane.
Leikanger har to hotell; Leikanger Fjordhotel og Sognefjord Hotel, og i tillegg Systrond Motell, Hyttesenter og Camping.
